黃絲帶之後…

上星期的反高鐵事件,相信各年齡的人士也有自己的想法,身為八十後的我,令我深深體會到一個經濟型地區發展的醜陋,她們會為了達到目的而硬闖過關,無論是否咨詢足夠,無論是否有良好的策劃和配套,也一於為了自私的利益而漠視別人的感受…

很簡單問自己一個問題,為什麼政府口口聲聲說要為我們的將來好,但為何會有那麼多年輕人要上街意圖阻止?我們不是將來社會的楝樑嗎?還是我們每一個人也輕易受別人疏擺,通通也是沒有思想的人?

平日,我很少跟政治和立法會拉上關係,但今次的黃絲帶事件,令我花了幾小時去欣賞他們在立法會內的情況,終於都明白,何為垃圾會。跟本就沒有公平,無論發問什麼問題,提出什麼動議,只要是一眾泛民議員提出,無論是對香港人的切身問題也好,另一邊的建制派一定會反對。

聽下去,像是有一班議員在拖延時間,反覆發問,但實際上,的而且確有很多問題出現而未得到解決,那麼草率便批了一筆香港人的血汗錢,去興建一條那麼多問題的鐵路,現在說它將來對我們的影響和價值還言之過早,但肯定的,它現在傷了一班年輕人的心,破壞了立法局和一眾政府高官的形象,令我們對政府失去信心!

8 Comments

  1. by WiLLiAM FuNG on 25 January, 2010  0:13 Reply

    今時今日,根本就沒有公平、沒有公義...
    議會中無論是左、中、右派,
    凡事只要涉及權力和利益時 (包括有形或無形;團體或個人),
    口中的民意只係工具、仁義道德都只係武器!
    說穿了,只不過係幾邦人互相玩緊個角色扮演的遊戲,
    “娛樂性”就有餘、建設性就不足...
    有幾多個真真正正係為民請命、香港良心?我真係睇唔到!
    反正齊齊都在玩場大龍鳳,今日你插下我、第日就我插下你,
    講到尾,咪又係從中睇下邊個搵到/呃到多 D 選民支持,
    因為只有爭取到選民的一票,佢地十狗幾萬的月薪才得己延續落去......
    好老實,我對呢班人真係冇咩感覺,
    好聽D... 叫用平常心面對...
    正確D... 叫死心.....
    佢地經年累月的爭鬥,其實香港前途早就成了最大的犧牲品。

    • by Jack on 25 January, 2010  0:31 Reply

      will 仔估唔到平時你唔聲唔聲咁有建地,下次有絲帶預埋你!

  2. by b仔 on 25 January, 2010  15:58 Reply

    有次新聞聽到曾生講 佢好多親戚做警察 所以好明警隊訴求-.-
    心諗..哦 唔怪得消防唔夠對講機同B.A啦- -

  3. by b仔 on 25 January, 2010  16:06 Reply

    其實今次起鐵路...我個人認為起唔起唔緊要..香港基本上已經有完善既交通..洗唔洗下下成塊地去產起擺堆鐵放架車...
    起起下 香港落去真係唔掂..成日開口埋口 藍天白雲你我做起
    政府連保育下環境都唔制 美影愈來愈少
    環境都保唔掂 仲點藍天白雲?你估靠唔開冷氣唔渣車就改善咩
    又唔見D高官答巴士返工?

  4. by WiLLiAM FuNG on 26 January, 2010  1:28 Reply

    雖然我都叫八十後,不過我今次係支持起高鐵的,
    成件事最大問題反而係大家己經對呢個香港政府信任度不足,
    經過數碼港、迪迪尼、科學園、啟德郵輪碼頭、西九文化區等等之後...
    大家心底深處己經覺得政府一事無成,對佢地所講的都大失所望...
    到今次要起高鐵時,因為狼己經來了太多次... 反對聲音咁大係好正常...
    加上高鐵香港段的規劃比內地遲了幾年起步,
    政府為左追落後而有點夾硬黎...引至大家對呢件事更加反感吧...

    事實上,成個計劃又未至於反高鐵人仕所講咁差,
    而普羅大眾對國內高速鐵路網規劃又一知半解...
    所以先攪到如此田地...

    又或者,「廣深港高鐵」呢個名真係改得衰,
    攪到大家誤以為呢條只係來往香港至廣州的「廣九直通車」吧...
    如果,一早叫番呢條線做 「CRH - 和諧號」,大家可能會易D明暸係咩野一回事!
    因為我相信好多香港人,在過去呢兩三年都有機會搭過深圳火車站開出往廣州東的 CRH 列車。約 10~15分鐘一班, 60 分鐘車程,最高時速二百公里,的確把廣州和深圳的車程大大縮減了兩三倍。誰都知在中國搭長途巴士係世間上最危險的事,塞車、意外、車匪路霸等等咩事都會發生,而有搭過廣深城際 CRH 的人應該都會認同,除左節省兩至三倍時間,CRH 都係相對地安全可靠,班次頻密,載客量大等優點吧...

    而香港依家要起的,就係比廣深城際 CRH 更高一個層次的和階號,
    級別等同京津、武廣線的 350km/h 級別,
    而由香港出發去廣州南站,車程預計係 48 分鐘。
    講到呢度,可能大家對廣州南站又有點迫生... 以為係山卡啦地方...
    其實,廣州南站係位於番禺鍾村石壁,
    鍾村係邊?咪即係祈福新村、奧園、長隆渡假區、碧桂園附近囉!!
    大家係咪即刻有個概念呢?知道依家由香港搭直通巴士去呢度要幾耐嗎?
    我可以話俾你知,朝早八點正由灣仔中旅上車,經西部通道過關,再上廣深高速去祈福新村,冇意外的話,要中午十二點至落到車,足足有四個鐘.... 如果塞車仲大鑊,在公路上塞一兩個鐘係好平常,因為國內公路處理意外/修路的方法同效率係極慢,所以 48 分鐵鐘同 240 分鐘,己經係一個極大的分別。

    呢個廣州南站,其實己經起到七七八八,預計本年11月就可以投入服務,
    (之所以點解政府為左追落後而夾硬黎,因為人地幾乎起好了...)
    由香港去呢個站目的係咩?梗係不單止為左去祈福長隆啦!
    而係因為呢個站將會係接駁中國高速鐵路網,
    到時去武漢只係 5 個鐘,去上海只係 8 個鐘,去北京都只係10 個鐘,
    雖然表面上唔夠飛機快,但旅客成本己經減少左好多,
    而且搭飛機,除左機程,其實仲要加埋去機場的車程、CHECK-IN、安檢,到步後等行李,由機場出市區等等,加加埋埋隨時都額外花左三四個鐘,航班的局限性又大,班次有限,相對地其實都唔快得過搭火車幾多!同時,飛機係極之唔環保的交通公具,載客量少之餘,消耗燃料又多,飛行過程又不斷製做廢氣,對環境百害而無一利。所以發展高速鐵路其實係大趨勢,日本就係一個好成功的例子。

    講到尾,今次呢單野,長遠本來係好的,
    但天時、地利、人和樣樣都錯晒,
    政府真係要好好檢討下...

    • by Jack on 26 January, 2010  6:36 Reply

      will 仔果然分析得好好,好詳盡~
      希望大家也明白,有很多東西都有兩難,睇下你由什麼角度出發...
      唔該晒 will 仔!你也應該要寫下 BLOG 啦!^^

  5. by WiLLiAM FuNG on 26 January, 2010  9:42 Reply

    其實十一、二年前,我己經有寫網頁同日記,不過寫寫下變了週記...後來變了月記...最終呢... 我諗你都估到了!

    作為理性的八十後, 當然有d普世價值同原則我地要堅持吧,但我地凡事都要多角度了解, 因為凡事都總有優劣, 總要有取捨, 今時今日的社會運動同政治團體經常把自己的立場極左/極右化, 所有野都只有黑和白, 只有對與錯!其實,一張完美的黑白相,除了要有黑和白,當中還要有不同層次的灰!而且灰色許多時都係佔最大的部份!所以我地要避免被某一種意見所蒙蔽,因為好多時都唔係事實的全部!反而退一步,看到的可能會更多!別當盲目的八十後!

  6. by Winnie Chan on 28 January, 2010  22:58 Reply

    我都想讚吓William,凡事都不會絕對好或絕對錯,我哋祇能夠希望盡量做到和諧共融。

Leave a reply

Your email address will not be published.